Sumqayıtda “Azərbaycan səhiyyəsinin inkişafı Heydər Əliyevin adı ilə bağlıdır” mövzusunda tədbir keçirilib. Bu haqda 17 may tarixində Sumqayıt24 xəbər verir.
Tədbir şəhərin 75 illik yubileyi və “Yaşıl dünya naminə həmrəylik ili” münasibətilə təşkil olunub. İştirakçılar öncə ümummilli lider Heydər Əliyevin abidəsi önünə tər gül dəstələri düzüb, əziz xatirəsini ehtiramla yad ediblər.
Heydər Əliyev Mərkəzində davam etdirilən toplantıda Dövlət Himni səsləndirilib, şəhidlərimizin ruhu 1 dəqiqəlik sükutla yad edilib. Ulu öndərin Azərbaycan səhiyyəsinin inkişafında göstərdiyi xidmətlərə dair videoçarx nümayiş olunub.
Burada incəsənət ustaları konsert proqramı ilə çıxış ediblər. Şəhid övladlarından ibarət xor kollektivinin çıxışı izləyiciləri qürurlandırıb. Balaca fidanlara hədiyyələr, xor kollektivinin rəhbəri Həcər Əkbərovaya Təşəkkürnamə təqdim olunub.
Toplantı Sumqayıt Şəhər İcra Hakimiyyətinin və Sumqayıt Tibb Mərkəzinin (STM) birgə təşkilatçılığı ilə reallaşıb.
