Çin Xalq Respublikasının səfiri Qo Min və nümayəndə heyəti Sumqayıta gəliblər. Sumqayıt24 bu haqda 2 noyabr tarixində xəbər verir.
Sumqayıt şəhər İcra Hakimiyyətinin başçısı Zakir Fərəcov onları qəbul edib. Şəhər rəhbəri Azərbaycan-Çin əlaqələrinin möhkəm dostluğa və qarşılıqlı etimada əsaslandığını vurğulayıb.
Zakir Fərəcov qonaqlara şəhərimiz və onun iqtisadi inkişafından danışıb. Qeyd olunub ki, Sumqayıt Cənubi Qafqazın ikinci böyük sənaye mərkəzidir. Hazırda sənaye müəssisələrinin yenidən qurulması, modernləşdirilməsi, müasir sənaye mərkəzlərinin yaradılması istiqamətində kompleks tədbirlər görülür.
Çin Xalq Respublikasının ölkəmizdəki səfiri Qo Min səmimi görüşə görə minnətdarlığını bildirib. O, ikitərəfli əlaqələrin daha da genişləndirilməsinin vacibliyini vurğulayıb.
Sonda münasibətlərin müxtəlif aspektləri və əməkdaşlığın perspektivləri barədə fikir mübadiləsi aparılıb.
