Sumqayıtda yataqxana dörd bir yandan borularla əhatə olunub. Sumqayıt24 bu haqda 28 iyun tarixində xəbər verir.
Bina 41-ci məhəllədə yerləşir. Həmin borular fasadla çəkildiyinə görə elə sayğaclar da çöldə quraşdırılıb. Ən pisi isə odur ki, boruların əhatəsində üstüaçıq elektrik xətləri də keçir.
Ərazidə olan bütün yataqxanalar sovet dövründə fəaliyyət göstərən bəzi zavod və fabriklərin işçiləri üçün tikilib. Bir müddət sonra baxımsızlıqdan yararsız vəziyyətə düşüb. Əvvəlcə su, kanalizasiya xətləri, ardınca isə zirzəmi və binanın divarları sıradan çıxıb.
Yaranan problemi sakinlər aradan qaldırsalar da, bu, uzun sürməyib.
“Qışda o borular hamısı donur, partlayır, camaat bir də çəkir. Yay gələndə yuxarı mərtəbələrə su çıxmır”, - deyə sakinlər bildiriblər.
Həmçinin binanın daxili xətləri yaşayış üçün ciddi problem yaradır. İnsanlar deyirlər ki, su və kanalizasiya boruları çöldən çəkiləndə içəridəki boruları ləğv edə bilməyiblər. Nəticədə çirkab sular dayanmadan zirzəmiyə axır.
Sumqayıt Şəhər İcra Hakimiyyəti məsələ ilə bağlı ARB Xəbər-ə açıqlama verib:
“Hazırda şəhərdəki yataqxanalarla bağlı lazımi addımlar atılır. Qəzalı vəziyyətdə olanlar sökülür, şəraitsizlər isə yenidən qurulur. Layihə ardıcıl həyata keçirilir. Siyahıya Koroğlu küçəsindəki 11 yataqxana da daxildir”.
