Xarici nümayəndəlik Sumqayıt Dövlət Universitetinə (SDU) gəlib. Sumqayıt24 bu haqda 8 fevral tarixində xəbər verir.
SDU-nun rektoru dosent Rüfət Əzizov Koreya Beynəlxalq Əməkdaşlıq Agentliyinin (KOICA) nümayəndələri Edi Çoy, Brayn Li və Cozef Lini qəbul edib. Onlara təhsil ocağının beynəlxalq əlaqələrindən danışıb, xarici universitetlərlə yanaşı, beynəlxalq şirkətlərlə də əməkdaşlığa önəm verdiklərini vurğulayıb.
Rektorun sözlərinə görə, beynəlmiləlləşmə istiqamətində islahatların aparılması, xarici əlaqələrin genişləndirilməsi, yeni əməkdaşlıqların qurulması, müəllim-tələbə mobilliyinin artırılması, sənaye müəssisələri ilə sıx əlaqələrin qurulması hər bir ali təhsil müəssisəsi üçün prioritet məsələlərdəndir.
Koreya Beynəlxalq Əməkdaşlıq Agentliyinin nümayəndəsi Edi Çoy qurumun ölkəmizdə həyata keçirdiyi innovativ layihələrdən söz açıb. Daha sonra KOICA ilə İnnovasiya və Rəqəmsal İnkişaf Agentliyi arasındakı əməkdaşlıq çərçivəsində “Potensialın gücləndirilməsi” layihəsi barədə təqdimatla çıxış edib.
O, tələbələr üçün Startap akselerasiya proqramı (SAP) və müəllimlər üçün həyata keçirilən Təlimçilərin təlimi proqramından (TTT) danışıb. SDU ilə gələcək əməkdaşlıq perspektivləri, kadr və təcrübə mübadiləsinin aparılmasının vacibliyini qeyd edib. Professor Cozef Li Joongbu Universitetinin Mühəndislik fakültəsinin dekanı olaraq, universitetimizlə görülə biləcək işləri dilə gətirib.
Sonda SDU ilə KOICA arasında qurulacaq əməkdaşlıq məsələləri müzakirə edilib, təkliflər dinlənilib.
