Həbsdə olan jurnalist Cəmil Məmmədli barəsində hökmdən verilmiş şikayətlərə baxılıb. Sumqayıt24 bu haqda 12 sentyabr tarixində Qafqazinfo.az-a istinadən xəbər verir.
Sumqayıt Apellyasiya Məhkəməsində keçirilən iclasda zərərçəkmişlər cəzanın ağırlaşdırılmasını, təqsirləndirilən şəxs isə bəraət qərarı çıxarılmasını xahiş ediblər.
C.Məmmədli barəsində şikayətə ilk olaraq Xaçmaz Rayon Məhkəməsində baxılıb. Xüsusi ittihamçılar Fuad Həbibov, Gülnarə Həbibova, Cavid Həbibov, və Kəmalə Həbibova birgə məhkəməyə müraciət ediblər.
Şikayət onunla əsaslandırılıb ki, təqsirləndirilən şəxs sosial şəbəkə üzərindən onlara böhtan atıb, həmçinin ünvanlarına söyüş söyüb. Xüsusi ittihamçılar C.Məmmədlinin Cinayət Məcəlləsinin 147-ci (böhtan) və 148-ci (təhqir) maddələrinə əsasən, cəzalandırılmasını tələb ediblər.
Təqsirləndirilən şəxs barəsindəki ittihamları qəbul etməyib. Hökmə əsasən, Cəmil Məmmədli verilmiş ittihamlarla təqsirli bilinib.
Lakin məhkəmə ona münasibətdə həbsə alternativ cəza növünü tətbiq edib. O, aylıq qazancından 20% dövlət nəfinə tutulması şərti ilə 2 il müddətinə islah işlərinə məhkum edilib. Hər iki tərəf hökmdən apellyasiya şikayəti verib.
C.Məmmədli bəraət qərarı çıxarılmasını, digər tərəf isə cəzanın ağırlaşdırılmasını xahiş ediblər.
Məhkəmə tərəflərin şikayətlərini təmin etməyib. Qərara əsasən, birinci instansiya məhkəməsinin qərarı dəyişdirilmədən saxlanılıb.
Qeyd edək ki, hazırda Cəmil Məmmədli hədə-qorxu ilə tələb etməklə, dələduzluqla və xuliqanlıqla bağlı həbsdədir.
