“Sumqayıt” futbol klubu yenidən qurulan stadionda oynamayacaq. Sumqayıt24 bu haqda 24 oktyabr tarixində Futbolinfo.az-a istinadən xəbər verir.
Mehdi Hüseynzadə adına Sumqayıt şəhər stadionu komandanın ixtiyarına verilməyəcək. İdman qurğusu bir müddət futbolsuz qalacaq. “Sumqayıt” matçlarını 1500 azarkeş tutumu olan “Kapital Bank Arena”da keçirməyə davam edəcək. Məlumata əsasən, Şəhər İcra Hakimiyyətinin balansında olan əsas arenanın icarə haqqı yüksəkdir.
Stadionun təmtəraqlı açılışının keçirilməməsinin səbəbi isə işıqlandırma sistemində problemlərin olması, inzibati otaqlar, paltardəyişmə yerləri və hamamın plansız hazırlanmasıdır. Bütün bunlar Mehdi Hüseynzadə adına stadionda çempionat oyunlarının təşkilinə əngəl yaradır. Gecə saatlarında burada matç keçirmək mümkünsüzdür.
Xatırladaq ki, dünən dövlət başçısı İlham Əliyev meydançada aparılan yenidənqurma işlərinə baxış keçirib.
