Sumqayıtda tədris ocağında çalışan müəllimlərin maaşları azaldılıb. Bu haqda 10 yanvar tarixində Sumqayıt24-ə məlumat daxil olub.
Söhbət İqtisadi Zonaların İnkişafı Agentliyi (İZİA) nəzdində fəaliyyət göstərən Peşə Təhsil Mərkəzindən gedir. Redaksiyamıza daxil olan müraciətlərdə iddia olunur ki, təhsil müəssisəsinə yeni direktor təyin ediləndən sonra müəllimlərin əməkhaqqıları hər dərs saatına görə 14 AZN-dən 7,40 AZN-ə endirilib. Bu isə təhsilverənlərin narazılığına və bir çox işçilərin işdən ayrılmalarına səbəb olub.
Məsələ ilə bağlı sözügedən Təhsil Mərkəzinin mətbuat işləri üzrə nümayəndəsi Elçin Kazımlı Sumqayıt24-ə açıqlama verib:
“Nazirlər Kabinetinin Peşə Təhsil Mərkəzinin əməkhaqqı ilə bağlı müvafiq qərarına əsasən, işçilərin saathesabı əməkhaqqısı 7,40 AZN təşkil edir. Bundan əvvəl maaş 14 manat idi. Bu məbləğ mükafatla bir hesablanırdı. Yeni rəhbər gələndən sonra isə qanuna müvafiq olaraq 7,40 AZN məbləğində müəyyənləşdirilib”.
O, həmçinin əlavə edib ki, işçilərə il ərzində müəyyən qədər mükafat da verilir.
Qeyd edək ki, sözügedən tədris ocağının direktor vəzifəsinə Kənan Bağırov və direktor müavini Mehman Abduləzizov ötən ilin noyabr ayında təyin ediliblər.
[modula id="48198"]
