Şəhid baş leytenant Elvin Zakirovun doğum günüdür. O, 15 avqust 1980-ci ildə Sumqayıtda anadan olub.
1998-ci ildə Zülfü Hacıyev adına 17 nömrəli məktəbi bitirib. Sonra ali təhsil alaraq hərbi xidmətə yollanıb. Goranboy rayonunda, cəbhə bölgəsində xidmət edib. Hərbi xidmətdən sonra 14 nömrəli məktəbdə fiziki tərbiyə müəllimi işləyib.
Lakin çox keçmədən öz ərizəsi ilə yenidən hərbi xidmətə qayıdıb. Qazax rayonunda cəbhə bölgəsində yerləşən postlarda tağım komandiri vəzifəsini icra edib və baş leytenant rütbəsini alıb. Bir müddət Lənkəran və Astarada xidmət edib, amma səhhətində yaranan problemlərlə bağlı ordu sıralarından ehtiyata buraxılıb.
Vətən müharibəsi zamanı Elvin Zakirov Füzuli istiqamətində döyüşlərə qatılıb, sonra isə Xocavənd uğrunda savaşıb. 2020-ci il noyabr ayının 9-da Xocavənd-Şuşa istiqamətində qəhrəmancasına şəhadətə ucalıb. Ölümündən sonra bir sıra medallara layiq görülüb.
Şəhidimiz ailəli idi. Qızı və oğlu Vətənə əmənat qalıblar.
