Sumqayıtda şəhərdaxili sərnişindaşıma ilə bağlı narazılıq doğuran görüntülər yayılıb.
Vətəndaşın Sumqayit24.az-a göndərdiyi videoda Corat qəsəbəsi ilə Şəfər qəsəbəsi arasında hərəkət edən 12 nömrəli marşrutun "Isuzu
Novociti" markalı avtobusunun arxa qapısı açıq vəziyyətdə hərəkət etdiyi görünür.
Səbəb isə avtobusun arxa qapısının qırılaraq asılı vəziyyətdə qalmasıdır. Buna baxmayaraq, avtobusun sərnişinlərlə hərəkətini davam etdirdiyi bildirilir.
Görüntülər avtobusların texniki vəziyyəti ilə bağlı suallar yaradıb. Şikayətçi hesab edir ki, Azərbaycanın ən iri şəhərlərindən biri olan Sumqayıtın yollarında bu vəziyyətdə və köhnəlmiş avtobusların hərəkət etməsi yolverilməzdir:
"Azərbaycanın ən iri şəhərlərinin birinin yollarında belə xarab və köhnə avtobusların hərəkət etməsi utancvericidir".
