Sumqayıt Dövlət Universitetinin (SDU) tələbələri II Rəqəmsal İdeya Müsabiqəsində iştirak ediblər. Bu haqda 20 iyun tarixində Sumqayıt24 SDU-ya istinadən məlumat verir.
Ümummilli lider Heydər Əliyevin 100 illiyinə həsr olunmuş “Heydər Əliyev irsinin təşviqi innovativ həllərdə” adlı 2 Rəqəmsal İdeya Müsabiqəsi keçirilib.
SDU tələbələrin qatıldığı müsabiqəyə respublikamızın 63 inzibati ərazi vahidindən 1372 gənc müraciət edib. Onlardan 120 nəfər seçilərək 30 fərqli komandada yarışıb.
Münsiflər heyəti tərəfindən 3 qalib komanda müəyyən edilib. Yarışın sonunda SDU-nun Riyaziyyat fakültəsinin 427 saylı qrup tələbəsi Ləman Balabəyovanın da qatıldığı “İstiqlal” komandası II yerə layiq görülüb.
Komanda üzvləri diplom və xatirə hədiyyələri ilə mükafatlandırılıblar. Müsabiqədə iştirak edən digər tələbələrimiz isə sertifikatlarla təltif olunublar.
