Sumqayıt Dövlət Univesitetində (SDU) yeni təyinat olub. Sumqayıt24 bu haqda 27 yanvar tarixində xəbər verir.
Gülnar Cəfərova Təhsildə keyfiyyət təminatı və strategiya şöbəsinin müdiri vəzifəsinə təyinat alıb. Gənc rəhbəri yaxından tanıyaq:
Gülnar Həsən qızı Cəfərova Azərbaycan Dövlət Pedaqoji Universitetinin Pedaqoji fakültəsinin "İbtidai sinif müəllimliyi" ixtisası üzrə bakalavr pilləsində oxuyub. Bu müddət ərzində "Mövlana Mübadilə Proqramı" vasitəsilə Türkiyə Respublikası Kastamonu Dövlət Universitetində təhsil alıb, beynəlxalq təcrübə qazanıb. Magistr təhsilini Azərbaycan Dövlət Pedaqoji Universitetinin "Təhsil menecmenti" ixtisası üzrə fərqlənmə diplomu ilə bitirib. Hazırda Türkiyə Dövlət Təqaüd Proqramı çərçivəsində Necmettin Erbakan Universitetinin "Təhsilin idarə olunması" ixtisası üzrə doktorantura təhsilinin son mərhələsindədir. "Müəllim liderliyi və data (verilənlər) əsaslı qərar vermənin təhsilalanların akademik göstəricilərinə təsiri” adlı dissertasiya mövzusu üzərində çalışır.
Cəfərova təhsil adlığı müddətdə müxtəlif mövzular üzrə tədqiqatlar aparıb. Liderlik, müəllim liderliyi, data (verilənlər) əsaslı qərar vermə, tələbələrin ünsiyyət bacarıqları, təşkilati öyrənmə, müəllimlərin peşəvi hörmətləri, müəllimlərin işə inteqrasiyası, effektiv məktəb, məktəb mühiti və s. mövzular maraq dairəsindədir. Sözügedən sahələrdə akademik nəşrlərin, eyni zamanda “Təhsildə idarəetmə” fənni üzrə tədris vəsaitinin müəllifidir. “Uluslararası öğrenciler bir değerdir” adlı layihəsi Türkiyə Respublikasında beynəlxalq tələbələr arasında müsabiqədə 2-ci yeri tutub.
Azərbaycan Dövlət Pedaqoji Universitetində Sabah qrupları layihəsinin magistratura səviyyəsində fənn müəllimi, Azərbaycan Respublikası Təhsil İnstitutunun müxtəlif layihələrində mentor, təlimçi, akademik məsləhətçi və Təhsildə strateji tədqiqatlar şöbəsinin aparıcı mütəxəssisi kimi fəaliyyət göstərib.
