Sumqayıt Dövlət Universitetinin prorektoru, dosent Elşad Abdullayevin həmmüəllifi olduğu məqalə nüfuzlu beynəlxalq elmi jurnalda dərc olunub.
Sumqayit24.az xəbər verir ki, bu barədə universitetin sosial şəbəkə hesabında paylaşım edilib.
Qeyd olunub ki, Elşad Abdullayevin həmmüəllifi olduğu "Transformation of p,p′-DDT in Ethanol under Ionizing Radiation: Mechanistic and Qualitative Characterization by GC-MS" adlı elmi məqalə nüfuzlu Journal of Hazardous Materials jurnalında dərc olunub.
Q1 kateqoriyasına daxil olan və 10.6 impakt faktoruna malik jurnalda yayımlanan tədqiqatda p,p′-DDT kimi təhlükəli üzvi çirkləndiricinin ionlaşdırıcı şüalanmanın təsiri ilə transformasiyası, yaranan məhsullar və prosesin mümkün mexanizmləri GC-MS metodu əsasında araşdırılıb.
Tədqiqat Sumqayıt Dövlət Universiteti, Azərbaycan Dövlət Neft və Sənaye Universiteti nəzdində UFAZ (Azərbaycan-Fransa Universiteti) və Birləşmiş Ərəb Əmirlikləri Universiteti alimlərinin elmi əməkdaşlığı çərçivəsində həyata keçirilib.
Nəşr yerli elmi potensialın beynəlxalq tədqiqat imkanları ilə inteqrasiyasının, eləcə də müxtəlif elmi qurumlar arasında əməkdaşlığın nümunəsidir.
