Sumqayıt Dövlət Universitetinin (SDU) Elmi Kitabxanasına 147 adda 360-a yaxın nüsxə kitab hədiyyə olunub. Sumqayıt24 bu haqda 15 fevral tarixində xəbər verir.
Sözügedən aksiyanı Bakı Dövlət Universitetinin (BDU) Elmi Kitabxanası Beynəlxalq Kitab Bağışlama Günü münasibətilə keçirib. Hədiyyə olunmuş kitablar arasında Azərbaycan dili və nitq mədəniyyəti, Azərbaycan ədəbiyyatı, tarixi, pedaqogika, ekologiya, coğrafiya, təhsil, iqtisadiyyat, menecment, bank işi, makro və mikroiqtisadiyyata aid ingilis dilindən Azərbaycan dilinə tərcümə edilmiş beynəlxalq miqyaslı akademik nəşrlər, dərsliklər yer alır.
BDU Elmi Kitabxanasının direktoru Nigar İsmayılova təqdimat tədbirində kitabların gənclərin dünyagörüşünün inkişafındakı rolundan danışıb. Bildirilib ki, kitabxana hər il 14 fevral tarixində bu cür aksiya keçirir. Kitabxana bu il də yeni çapdan çıxmış BDU nəşrlərini, ali məktəb tələbələri üçün dərslik və dərs vəsaitlərini SDU-ya hədiyyə edir.
SDU-nun Sosial məsələlər və ictimaiyyətlə əlaqələr üzrə prorektoru dosent Elmar Xəlilov BDU-nun Elmi Kitabxanasının direktoru Nigar xanıma təşəkkürlərini bildirib.
