"Sumqayıt" futbol klubunun ev oyunlarını keçirdiyi Mehdi Hüseynzadə adına stadionda yaranan ot örtüyü problemi hələ də tam aradan qaldırılmayıb.
Bu səbəbdən komanda mövsümün ilk turunda "Neftçi" ilə qarşılaşmasını "SOCAR Polymer Arena"da keçirib. Avqustun 31-də "Qarabağ"la keçiriləcək oyuna qədər stadiondakı ot örtüyünün normal vəziyyətə gətiriləcəyi gözlənilsə də, bu baş verməyib.
Nəticədə "kimyaçılar" Ağdam təmsilçisini də "SOCAR Polymer Arena"da qəbul edəcək.
Sumqayit24.az stadionun nə vaxt tam hazır olacağı ilə bağlı "Sumqayıt" klubuna sorğu ünvanlayıb.
Klubun mətbuat katibi Zaur Xudiyev sorğumuza cavab olaraq bildirib ki, ot örtüyünün yenilənməsinin ilkin mərhələsi başa çatıb:
"Artıq yeni salınan örtük cücərib, yaşıllaşıb. Amma onun kökünün bərkiməsi lazımdır. Biz əslində "Qarabağ"la oyunu orada keçirməyi istəyirdik, sadəcə risk etmədik. Çünki ot örtüyünün bir qədər də kökünün bərkiməsi, möhkəmlənməsi lazımdır. Buna görə qərara gəldik ki, bu matçı da "SOCAR Polymer Arena"da keçirək.
Bundan sonrakı oyunumuz səfərdə "Turan Tovuz"la olacaq. Ondan sonra isə "Şamaxı"nı qəbul edəcəyik. İki həftə vaxtımız olacaq ki, stadion tam özünə gəlsin və ot örtüyü bərkisin. Növbəti ev oyunumuzu ümid edirik ki, Mehdi Hüseynzadə adına stadionda keçirəcəyik".
