Sumqayıt şəhərinə əlavə funksiyalar veriləcək. Sumqayıt24 bu haqda 13 yanvar tarixində Qaynarinfo.az-a istinadən xəbər verir.
Bunu Dövlət Şəhərsalma və Arxitektura Komitəsi sədrinin müavini İlqar İsbatov deyib. İqtisadçı ekspert Natiq Cəfərli onun fikirlərini şərh edərkən bildirib ki, rəsmi şəxslər bəzi hallarda səsləndirdikləri fikirlərində söhbətin hansı funksiyalardan getdiyini və onun nəyi dəyişəcəyini gizlədirlər:
"Sumqayıta əlavə funksiyalar veriləcəyi deyilsə də, söhbətin hansı funksiyalardan getdiyi müəmmalı qalır. Hansı dövlət orqanlarının Sumqayıtda yerləşdiriləcəyi, tıxac probleminin həlli üçün şəhərə hansı yolların çəkiləcəyi sualları açıq qalır. Lakin Sumqayıta əlavə funksiyalar veriləcəksə, ilk növbədə bu və digər şəhərlərdə yerli özünüidarə orqanları ilə bağlı addımlar atılmalıdır. Sumqayıt böyük şəhər bələdiyyəsi yaradılmalıdır. Əlavə olaraq, idarəetmə sisteminin necə olacağı da maraqlıdır. Hansısa dövlət orqanları Sumqayıta köçəcəkmi? Bu, tıxac məsələsində əlavə problemlər yaratmayacaq ki? Ona görə də belə məsələlərdən danışarkən rəsmilər fikirlərini daha aydın ifadə etsələr, yaxşıdır".
