“Tabaterra” QSC və dünyanın qabaqcıl tütün məmulatları istehsalçısı olan “Japan Tobacco International” (JTI) arasında razılaşma əldə edilib. Sumqayıt24 bu haqda 8 iyul tarixində xəbər verir.
Strateji tərəfdaşlıq çərçivəsində JTI şirkətinə məxsus Gürcüstanda satılan “Sobranie”, “Winston” və “Camel” kimi dünyaca məşhur brendlər artıq “Tabaterra” tərəfindən Sumqayıtda istehsal olunacaq.
Yerli şirkətin direktoru Elman Cavanşirin sözlərinə görə, bu razılaşma ölkəmizə illik olaraq 13 milyon ABŞ dolları civarında valyuta axınını təmin edəcək.
“Tabaterra” istehsal etdiyi məhsulların keyfiyyət parametrlərinə görə JTI şirkəti ilə müqavilə və lisenziya əsasında əməkdaşlıq edən beynəlxalq fabriklər arasında daim lider mövqe tutur.
Sözügedən şirkət Sumqayıt Kimya Sənaye Parkının rezidentidir. “Tabaterra” öz məhsulları ilə yanaşı, “Japan Tobacco International”, “British American Tobacco” və “Imperial Tobacco Group” kimi şirkətlərin lisenziyası əsasında müxtəlif tütün məmulatları istehsal edir.
