Sumqayıtda 3 nömrəli poliklinikada günlərlə müşahidə olunan vətəndaş sıxlığı ilə bağlı açıqlama verilib. Bu haqda 12 sentyabr tarixində Sumqayıt24 xəbər verir.
Sumqayıt Tibb Mərkəzinin İctimaiyyətlə əlaqələr bölməsinin müdiri Ramil Zeynallı tibb məntəqəsində həkim növbəsinin yaranmasına aydınlıq gətirib.
“İcbari tibbi sığortanın tətbiqindən sonra dövlət tibb müəssisələrinə axın artıb. Bu isə poliklinika və xəstəxanalarda hər gün sıxlığa səbəb olur. Vətəndaşların ailə həkiminə müraciət zərurəti olmadığından birbaşa ixtisaslı həkimlərə müraciət edirlər. Bu da instrumental-laborator müayinələrin artmasına və kifayət qədər böyük növbənin yaranmasına səbəb olur. Növbə sisteminin tənzimlənməsi və sıxlığın aradan qaldırılması istiqamətində müvafiq addımlar atılacaq. Digər məsələyə gəldikdə isə laborator müayinələr həkimin göndərişinə əsasən həyata keçirilir. Həkim hansı müayinəyə göndəriş verirsə, pasiyent həmin laborator və instrumental müayinədən yararlana bilir. Dövlət tibb müəssisələrində bu müayinələr, analizlər həkim göstərişinə əsasən, icbari tibbi sığorta çərçivəsində ödənişsiz təqdim olunur”, – deyə Ramil Zeynallı məsələ ilə bağlı münasibət bildirib.
Xatırladaq ki, ötən həftə saytımız bu məqamı gündəmə gətirmişdi.
