Sumqayıtda bir ay ərzində sürücülərə 50 minə yaxın cərimə yazılıb. Sumqayıt24 bu haqda 28 avqust tarixində Daxili İşlər Nazirliyinə (DİN) istinadən xəbər verir.
Dövlət Yol Polisi Şöbəsinin əməkdaşları "Təmiz hava" aylığı çərçivəsində şəhərdə profilaktik tədbir keçiriblər. Atmosferi normadan artıq çirkləndirən avtomobillərin ixrac etdiyi dəm qazı yoxlanılıb.
Ekoloji normalara cavab verməyən avtomobil sahibləri cərimələniblər. Tədbir zamanı 40 sürücü barəsində İnzibati Xətalar Məcəlləsinə uyğun protokol tərtib edilib.
Həmçinin Sumqayıtda yol polisi cari il ərzində intizamsız sürücülərə qarşı 48.284 protokol tərtib edib. O cümlədən, avtomobili sərxoş vəziyyətdə idarə edən 370, narkotikin təsiri altında sükan arxasında əyləşən 128, sürücülük hüququ olmayan 110, avtoxuliqanlıq edən 5, polisin qanuni “saxla” əmrinə tabe olmayan 23, yük və sərnişindaşıma qaydalarını pozan 202, dayanma-durma qaydalarına əməl etməyən sürücülər barəsində 25.139 inzibati protokol tərtib edilib.
Avtomobilinə əlavə avadanlıqlar quraşdıran, eləcə də digər yol hərəkəti qaydalarını pozan sürücülər barəsində də müvafiq tədbirlər görülüb.
