Sumqayıt Kimya Sənaye Parkında təməli qoyulmuş “Çinar-Servis” İKF və “Kartaş Kimya” müəssisələrinin 2024-2025-ci illərdə açılması planlaşdırılır. Sumqayıt24 bu haqda 24 oktyabr tarixində Report.az-a istinadən xəbər verir.
İqtisadi Zonaların İnkişafı Agentliyinin idarə heyətinin sədri Elşad Nuriyev bildirib ki, müəssisələr tərəfindən sənaye parkına ümumilikdə 30 milyon manatdan çox investisiyanın yatırılması, 300-dən çox daimi iş yerinin yaradılması nəzərdə tutulur.
Onun sözlərinə görə, Sumqayıt Kimya Sənaye Parkında ümumi investisiyalarının həcmi təqribən 5,8 milyard manata yaxın 38 sahibkarlıq subyektinə rezidentlik statusu verilib:
“İndiyədək rezidentlər sənaye parkına 5,4 milyard manatdan çox investisiya yatırıb. Artıq qeydiyyata alınmış 38 rezidentdən 23-ü fəaliyyət göstərir. İndiyədək Sumqayıt Kimya Sənaye Parkının rezidentləri tərəfindən ümumilikdə 9,5 milyard manatlıq satış həyata keçirilib ki, onun da 3,3 milyard manatdan çox hissəsi – təqribən 34,7 %-i ixracın payına düşür”.
Elşad Nuriyev vurğulayıb ki, Sumqayıt Kimya Sənaye Parkında 2023-cü ilin 9 ayında 2,1 milyard manatlıq məhsul istehsal olunub:
“Bunun da 674,4 milyon manatlıq (32,1%) hissəsi ixrac edilib. Burada 6600-dən çox insan daimi işlə təmin olunub. Bundan əlavə, mövcud layihələr üzrə sənaye parkına əlavə olaraq 394 milyon manatdan artıq investisiyanın yatırılması, 2000-dən çox daimi iş yerinin yaradılması nəzərdə tutulur".
