Sumqayıt Kimya Sənaye Parkında görüş keçirilib. Sumqayıt24 bu haqda 17 iyun tarixində İqtisadi Zonaların İnkişafı Agentliyinə (İZİA) istinadən xəbər verir.
Tatarıstanın “Ximqrad” SC-nin baş direktoru Ayrat Qizzatullin və “İdeya Kapital” İdarəetmə şirkətinin baş direktoru Aleksey Qruşin İZİA-nın idarə heyətinin sədri Elşad Nuriyevlə görüşüblər.
Qonaqlara sənaye zonaları, burada sahibkarlar üçün yaradılan investisiya imkanları barədə məlumat verilib, sənaye zonalarının təqdimatı nümayiş etdirilib.
Sənaye zonalarında birgə layihələrin həyata keçirilməsi, əməkdaşlıq əlaqələrinin genişləndirilməsi, sənaye parklarının təşkili, idarə edilməsi və inkişafı sahəsində məlumat və təcrübə mübadiləsinin aparılması imkanları müzakirə olunub.
“Ximqrad” SC-yə daxil olan sənaye parkının rezidentləri Azərbaycanda sənaye zonalarına investisiya yatırmağa dəvət edilib.
Sonda qonaqlar Sumqayıt Kimya Sənaye Parkında görülmüş işlərlə, “Azerfloat” QSC-nin Şüşə istehsalı müəssisəsində, “STP” MMC-nin Polimer məmulatları və Ağır maşınqayırma zavodlarında gedən istehsal prosesləri ilə tanış olublar.
