Sumqayıtda əmək yarmarkası baş tutub. Sumqayıt24 bu haqda 23 iyun tarixində xəbər verir.
Tədbir Abşeron-Xızı Regional Məşğulluq filialının dəstəyi ilə təşkil olunub. Səhər saat 11:00-dan 13:00-dək keçirilən yarmarkaya şəhər üzrə 28 müəssisə qatılıb və 238 vakant iş yeri təqdim edilib. Bunlardan 197 yer peşə, 41 yer isə ixtisas tələb olunan sahələrə aid olub.
Ümumilikdə isə 36 operator, 32 fəhlə, 7 sürücü, 3 avtokran sürücüsü, 4 ekspeditor, 3 elektrik, 49 satıcı, 6 çilingər və digər iş yerləri mövcuddur. Həmçinin ali təhsilli namizədlərə mühasib, SƏTƏM mütəxəssisi, menecer, interyer dizayneri və sair vakansiyalar təklif olunub.
Yarmarkaya gələn namizədlər şəxsiyyət vəsiqələrini və CV-lərini təqdim edərək vakansiyalar, iş öhdəlikləri və şərtlər haqqında ətraflı məlumat alıb, maraqlandıqları təkliflə tanış olublar.
