Cinayət təqibindən kənar icraatlar idarəsi Sumqayıtda qanunsuz ağackəsmə faktını araşdırıb. Sumqayıt24 bu barədə 24 iyun tarixində Baş Prokurorluğa istinadən xəbər verir.
Sumqayıt şəhərinin 13-cü mikrorayonu, Bakı şəhəri Sabunçu rayonunun Xəstəxanayanı küçəsi, Xətai rayonunun Zeytun küçəsi, Xırdalan şəhərinin 28-ci məhəlləsi, Samux rayonunun Sərkar və Qarağaclı kəndləri, Qusar rayonunun Yasab kəndi, Bərdə rayonunun Lənbəran və Xanərəb kəndləri ərazisində meşə fonduna daxil olmayan, habelə ETSN yanında Meşələrin İnkişafı Xidmətinin Bərdə Regional Meşə Təsərrüfatı Mərkəzinin Bərdə Meşəbəyliyinin 1 saylı dolayının 16 nömrəli kvartalında meşə fonduna daxil olan, ümumilikdə 2254 ədəd ağac və kolun qanunsuz kəsilməsi nəticəsində təbiətə 76 min manatdan çox ziyan vurulmasına əsaslı şübhələr müəyyən edilib.
Faktlarla bağlı Cinayət Məcəlləsinin 259.1, 259.2.4 və 259.3-cü (qabaqcadan əlbir olan bir qrup şəxs tərəfindən xeyli və külli miqdarda ziyan vurmaqla qanunsuz ağac kəsmə) maddələri ilə cinayət işləri başlanıb, istintaqın aparılması üçün daxili işlər orqanlarına göndərilib.
