Sumqayıtda güzgü istehsalı müəssisəsinin tikintisinə başlanılacaq. Sumqayıt24 bu haqda 21 may tarixində Fed.az-a istinadən xəbər verir.
İşlər yaxın bir ay ərzində start götürəcək. Bunu Sumqayıt Kimya Sənaye Parkının rezidenti “Azermirror” MMC-nin direktoru Rüstəm Abbasov deyib. Onun sözlərinə görə, alüminium təbəqəli vərəqə güzgü istehsalı həyata keçirəcək zavodun investisiya dəyəri 11 milyon manata yaxındır. Onun tikintisinin təxminən 8-9 aya yekunlaşacağı gözlənilir.
Müəssisənin gündəlik istehsal həcmi işçilərin növbəlilik rejimindən asılı olaraq dəyişəcək. Zavod birnövbəli qrafiklə işləyərsə, onun gündəlik istehsal tutumu 4200 kv.m, ikinövbəli işləyərsə 8000 kv.m olacaq.
Zavodda 44 yeni daimi iş yeri yaradılacaq. İstehsal üçün tələb olunan avadanlıqlar Çindən gətiriləcək.
Tədarük edilən məhsulların daxili bazarda satışı ilə yanaşı, ixracı da planlaşdırılır. R.Abbasov bildirib ki, artıq Gürcüstan, Türkiyə və Polşa onların məhsulları ilə maraqlanır. İxrac ilkin mərhələdə Gürcüstan və Türkiyəyə gözlənilir:
“Türkiyədə güzgü istehsal edilir, lakin bu ölkə məhsula olan tələbatını tam olaraq ödəyə bilmir. Ona görə istehsala başladıqdan sonra bizdən də güzgü almaq istəyirlər. Bizim məhsulların keyfiyyəti yüksək olacaq”.
Qeyd olunub ki, müəssisə fəaliyyətə başladıqdan sonra Azərbaycanda idxalın qarşısı təxminən 80% alınacaq.
