Sumqayıt şəhərində təhsil işçilərinin ənənəvi sentyabr konfransı keçirilib.
Sumqayit24.az xəbər verir ki, tədbirdə Abşeron-Xızı Regional Təhsil İdarəsinin müdiri İlhamə Abdullayeva, Sumqayıt Şəhər İcra Hakimiyyəti başçısının birinci müavini Teymur Səmədov, Sumqayıt şəhəri üzrə təhsil sektorunun müdiri İman Ağayev, məktəb direktorları, məktəbəqədər təhsil müəssisələrinin rəhbərləri və digər təhsil işçiləri iştirak ediblər.
Təhsil İdarəsinin müdiri İlhamə Abdullayeva ötən tədris ilinin nəticələrindən danışaraq Sumqayıt üzrə əldə olunan uğurları diqqətə çatdırıb. Bildirilib ki, həyata keçirilən tədbirlər nəticəsində təhsilin keyfiyyətinin yüksəldilməsi, məktəblərdə idarəetmənin təkmilləşdirilməsi və şagird nailiyyətlərinin artırılması istiqamətində irəliləyişlər əldə olunub. Şagirdlərin respublika və beynəlxalq müsabiqə və olimpiadalardakı uğurları da qeyd edilib.
İlhamə Abdullayeva qarşıdakı dövrdə müəllimlərin peşəkar inkişafı, innovativ təlim metodlarının tətbiqi və rəqəmsal imkanlardan səmərəli istifadənin əsas prioritetlərdən olacağını vurğulayıb.
Teymur Səmədov çıxışında təhsilin cəmiyyətin inkişafındakı mühüm rolundan danışıb. O, dövlətin təhsil sahəsinə diqqət və qayğısını vurğulayaraq Sumqayıtda təhsil infrastrukturunun inkişafı, məktəblərin maddi-texniki bazasının gücləndirilməsi və şagirdlərin hərtərəfli inkişafı istiqamətində görülən işlərdən söz açıb.
İman Ağayev isə 2025–2026-cı tədris ili üzrə görülmüş işlərə dair hesabat təqdim edib. O, məktəblərdə əldə olunan nəticələri, şagird nailiyyətlərindəki dinamikanı və keyfiyyət yönümlü tədbirləri diqqətə çatdıraraq qarşıda duran əsas hədəfləri açıqlayıb.
Konfransda ötən tədris ilinin yekunları, mövcud problemlər və inkişaf istiqamətləri müzakirə olunub. Təhsilin keyfiyyətinin yüksəldilməsi, akademik nəticələrin yaxşılaşdırılması, müəllimlərin peşəkar inkişafı və rəqəmsal təhsil mühitinin genişləndirilməsi əsas prioritetlər kimi müəyyənləşdirilib.
Bildirilib ki, yeni tədris ilində Məktəb İnkişaf Planlarının tətbiqi genişləndiriləcək, akademik nəticələrin məlumatlara əsaslanan təhlili gücləndiriləcək və risk qrupunda olan məktəblərə məqsədyönlü dəstək göstəriləcək.
Konfrans qarşılıqlı müzakirələr və panel sessiyalarla davam etdirilib.
