Tibb müəssisələrində perinatal mərkəzlərin fəaliyyətinin dəyərləndirilməsi komissiyasının üzvləri Sumqayıt Tibb Mərkəzini, Perinatal mərkəzi və Doğuşa yardım mərkəzlərini ziyarət ediblər. Sumqayıt24 bu haqda 26 avqust tarixində DünyaTV-yə istinadən xəbər verir.
Komissiya tərəfindən analara göstərilən tibbi xidmətin dəyərləndirilməsi, infeksiyanın profilaktikası, infeksion nəzarət qaydalarının tətbiqi, yenidoğulmuşlara göstərilən tibbi xidmətin dəyərləndirilməsi və qaydalarının tətbiqi, kritik durumda daxil olan hamilələrə göstərilən tibbi xidmət, qadın reproduktiv sağlamlığının qorunmasına yönəldilmiş tədbirlərin həyata keçirilməsi, ana ölümlərinin qarşısının alınması məqsədilə aparılmış tədbirlər, eləcə də tibb personalının yeni doğulmuşlara göstərdiyi tibbi xidmət, qadın reproduktiv sağlamlıq sahəsində təlimlərdə iştirakı qiymətləndirilib.
Tədbir Sumqayıt Dövlət Dram Teatrında davam etdirilib. Sumqayıt Tibb Mərkəzinin direktoru Səkinə Sadıxova qonaqları salamlayıb və tədbirin əhəmiyyətindən danışıb. TƏBİB-nin icraçı direktorunun müavini Anar İsrafilovun sözlərinə görə, komissiya üzvləri təhlillər aparıblar.
Sumqayıt Perinatal mərkəzi publik hüquqi şəxsin rəhbəri, TƏBİB-nin tabeliyindəki tibb müəssisələrində hamiləlik, doğuş, sağlıq dövrlərində ana ölümü və erkən neoanatal dövrdə körpələrin ölümü və ağırlaşmış doğuş hallarının təhlili üzrə komissiyanın sədri Təranə Rəcəblinin və digər çıxış edənlərin məruzələri dinlənilib.
Bundan başqa, neonatal ölümlərin azaldılması istiqamətində görülmüş işlər, yenidoğulmuşların sağlamlığının qorunması məqsədilə skrininq proqramı çərçivəsində göstərilmiş laborator xidmətin təşkili, tibb müəssisələrində keyfiyyətə nəzarət işinin təşkili, tibb personalının sertifikasiya müddətinə və növbəlilik cədvəlinə nəzarət, tibb personalının vəzifə təlimatları haqqında məlumat bazasının yoxlanılması ilə bağlı maarifləndirmə aparılıb.
