Azərbaycan Universitetinin 3-cü kurs tələbəsi, 29 yaşlı Nurlan S. dələduzluğa görə həbs edilib. Bu haqda 21 fevral tarixində Sumqayıt24 Metbuat.az-a istinadən məlumat verir.
Proses Sumqayıt Şəhər Məhkəməsində aparılıb. Nurlan Cinayət Məcəlləsinin “Xeyli miqdarda ziyan vurmaqla dələduzluq” maddəsi ilə təqsirli bilib. O, 2 il müddətinə azadlıqdan məhrumetmə cəzasına məhkum edilib və məhkəmə zalında həbs edilib. Həmçinin məlum olub ki, həbs edilən tələbə “GESKO” şirkətində növbə rəisi vəzifəsində işləyirmiş.
Tələbənin Mirqalib adlı qazini aldadaraq ondan 22 min manat pulunu alması barədə şikayətdən sonra cinayət məsuliyyətinə cəlb edildiyi məlum olub. Nurlan həmin şəxsə müharibədə iştirakına görə torpaq sahəsi ayırtdıracağını və ev alacağını vəd edib. Qazidən 22 min manata yaxın pul alandan sonra isə bütün pulları “Topaz”da mərc oyunlarına qoyaraq uduzub.
Bundan sonra Mirqalib Q. polisə şikayət edib. Nurlanın ailəsi zərərçəkmişə cəmi 5 min manat qaytara bilib.
