Xaricdən gələn azərbaycanlı həkimlər Sumqayıt Tibb Mərkəzində (STM) olublar. Bu haqda 20 iyun tarixində Sumqayıt24 STM-ə istinadən məlumat verir.
Dünyadakı Azərbaycanlı Təbiblərin Simpoziumunda iştirak üçün təşrif buyuran mütəxəssislər işgüzar proqram çərçivəsində “Cərrahiyyədə multidisiplinar yanaşmalar”, “Daxili xəstəliklərin müalicəsində yeni yanaşmalar”, “Ailə və uşaq sağlamlığına strateji yanaşma”, “Oftalmologiyada yeniliklər” mövzularında panel müzakirələr təşkil edilib.
“Cərrahiyyədə multidisiplinar yanaşmalar” adlı panel müzakirəsində Almaniyada fəaliyyət göstərən təbib Gülşən Əhmədli “Tibb sahəsində idarəetmə”, “Çapıqların aktual cərrahi və qeyri-cərrahi müalicəsinə yeni baxışlar”, Rusiyada çalışan təbib İlqar Əliyev “Kəskin beyin-qan dövranının pozulmalarında intensiv-reanimasion tədbirlər” mövzularında təqdimatlarla çıxış ediblər.
“Daxili xəstəliklərin müalicəsində yeni yanaşmalar” adlı panel müzakirəsində Almaniyada fəaliyyət göstərən təbib Fuad Mahmudlu “Kəskin miokard infarktı olan xəstələrə müasir yanaşma, aktual problemlər”, Türkiyədə çalışan təbib Nihat Mustafayev “Nevroloji xəstəliklərdə ultrasəslə botulinum toksin müalicəsi”, Amerikada fəaliyyət göstərən təbib Xalis Mustafayev “Qlobal ictimai səhiyyə problemi” mövzularında təqdimatlarla çıxış ediblər.
“Ana və uşaq sağlamlığına strateji yanaşma” adlı panel müzakirəsində Türkiyədə fəaliyyət göstərən təbib Melahat Akgün “Ailə sağlamlıq mərkəzləri: hamiləlik, yenidoğulmuşun müayinələri, vaksinasiya”, Səudiyyə Ərəbistanında çalışan təbib Gültəkin Bəkirova “Reanimasiyada ultrasəs müayinələri” mövzularında təqdimatlarla çıxış ediblər.
“Oftalmologiyada yeniliklər” adlı panel müzakirəsində isə Amerika Birləşmiş Ştatlarında fəaliyyət göstərən təbib Lana Yusufova “Diabetik göz xəstəlikləri”, Almaniyada çalışan təbib Leyla Xəlilova “Uveal melanoma: aşkarlanması və terapiyası” mövzularında təqdimatla çıxış ediblər.
Sonda mütəxəssislər tərəfindən iştirakçıların sualları cavablandırılıb, fikir mübadiləsi aparılıb.
