Sumqayıt Tibb Mərkəzi (STM) səhiyyə müəssisəsində çap qurğusunun olmaması məsələsinə münasibət bildirib. Bu haqda 21 fevral tarixində Sumqayıt24 xəbər verir.
Xəbər verdiyimiz kimi, vətəndaşlar 2 saylı Sumqayıt şəhər xəstəxanasında verdikləri analizlərin cavablarını çətinliklə alırlar.
Məsələ ilə bağlı STM-in İctimaiyyətlə əlaqələr bölməsinin müdiri Ramil Zeynallı bildirib:
“Sumqayıt Tibb Mərkəzinin 2 nömrəli Xəstəxanasında laborator analiz nümunələri götürülür və nəticələr hazır olduqda xəstəxana tərəfindən pasiyentlərə təqdim olunur.
Müalicə ocağı müasir tələblərə cavab verən avadanlıqlarla təchiz edilib. Yazılanları təkzib edir və xəstəxanada çap qurğusu ilə bağlı hər hansı problemin olmadığını vurğulayırıq. Pasiyentlər tamamilə elektronlaşdırılmış analizlərinin nəticələrini xəstəxanaya gəlməklə, həmçinin müəssisəyə gəlmədən, “e-tabib” tətbiqi vasitəsilə və onlayn şəkildə (https://lab.tabib.gov.az/) əldə edə bilərlər”.
