Xəzər dənizində suyun səviyyəsinin aşağı enməsi ciddi narahatlıq doğurur. Bu haqda 18 sentyabr tarixində Sumqayıt24 Sputnik.az-a istinadən məlumat verir.
Bu hal Sumqayıt bulvarında da müşahidə olunur. Əvvəllər prosesə, əsasən, isti yay aylarında rast gəlinirdi. Hazırda isə yağıntılı aylar olmasına baxmayaraq, Xəzər dənizinin səviyyəsi aşağı düşməkdə davam edir.
Coğrafiya elmləri doktoru professor Əmir Əliyev məsələyə münasibət bildirib. Onun sözlərinə görə, Xəzər dənizində suyun səviyyəsinin enməsi su balansının dəyişməsinin nəticəsidir: "Bu il dünyada ən isti il olub. Dənizdə suyun azalması buxarlanmanın artması ilə də bağlıdır. Qlobal isitləşmə nəticəsində Xəzərin hövzəsinə tökülən suyun həcmi də azalır. Xəzər regionunda qlobal istiləşmə gedir".
Professor onu da əlavə edib ki, 2005-ci ildən bu günədək Xəzərin səviyyəsi təxminən ildə 20 sm aşağı düşür. 2030-cu ilədək bu prosesin davam edəcəyi proqnozlaşdırılır. Bu isə Xəzər regionunda iqlim dəyişiklikləri ilə əlaqədardır.
