Yenilənib saat: 17:32
“Bir sıra stansiya və vağzallarda (bu stansiya və vağzallar, əsasən, Abşeron dairəvi dəmiryol marşrutu boyunca yerləşir) pulsuz “Wi-Fi” xidməti istifadəyə verilib”.
Bunu Sumqayit24.az-a açıqlamasında "Azərbaycan Dəmir Yolları" QSC-nin rəsmisi bildirib. Qeyd olunub ki, rayonlararası marşrutlar üzrə hərəkət edən bütün qatarlarda COP29 dövründə pulsuz “Wi-Fi” xidməti aktiv edilib:
“Sözügedən problem Abşeron dairəvi dəmiryol marşrutu üzrə qatarların keçdiyi bəzi ərazilərdə (əsasən qeyri-yaşayış sahələri) ümumilikdə şəbəkənin zəif olması ilə bağlıdır”.
***
Saat: 16:07
Bakı-Sumqayıt qatarlarında mobil şəbəkə zəifdir.
Sumqayit24.az-a bu barədə Abşeron dairəvi dəmir yolu xəttinin daimi sərnişinləri məlumat veriblər. Onların sözlərinə görə, vaqonun daxilində nə zəng etmək, nə də internetə qoşulmaq mümkündür:
“Qatarın özündə WI-Fi yoxdur. Bu bir yana, heç olmasa şəbəkə qəbuledicisi qoysunlar ki, öz internetimiz işləsin.
Sərnişinlərin əksəriyyəti tələbələr və işçilərdi. İnternet onlar üçün vacibdir. İşlərini telefon vasitəsilə aparırlar”.
Məsələ ilə bağlı "Azərbaycan Dəmir Yolları" QSC-yə sorğu ünvanladıq.
