Xəbər verdiyimiz kimi, Sumqayıt şəhəri, 9-cu mikrorayon ərazisində səki zəbt edilib.
Sahib Qarayev küçəsində piyadaların hərəkəti üçün nəzərdə tutulan yolun üzərində qeyri-qanuni tikinti işləri aparılıb. Nəticədə səki daralıb, insanlar hərəkət etmək üçün avtomobil yoluna çıxmağa məcbur olurlar.
Sumqayıt Şəhər İcra Hakimiyyətindən Sumqayit24.az-a məsələ ilə bağlı belə bir açıqlama verilib:
“Məlumat üçün bildirək ki, qeyd olunan ərazidə səki yolun sol tərəfindədir. Şəhər ərazisində yol infrastrukturunun inkişafı ilə bağlı tədbirlər görülür. Həmin küçədə də səkilərin təmir olunması nəzərdə tutulub”.
Lakin icra qurumunun səki adlandırdığı ərazi səkidən başqa nəyə desən bənzəyir. Bu “səki”də üzbəüz gələn iki nəfərdən biri yola çıxmalı olur, həmçinin tam ortasında iki dirək quraşdırılıb.
