Xəbər verdiyimiz kimi, Sülh prospektində piyada keçidlərinin olmadığı hissədə- yolayrıcılarında yerləşən səkilər ləğv edilib, yerinə güllər əkilib.
Sakinlər isə piyada keçidlərinin bir-birindən uzaq məsafədə yerləşdiyini, bu səbəbdən çətinlik çəkdiklərini bildiriblər. Onlar yığışdırılan səkilərin yerinə “zebra”ların çəkilməsini istəyirlər.
Sumqayıt Şəhər İcra Hakimiyyətindən Sumqayit24.az-a məsələ ilə bağlı açıqlama verilib. Bildirilib ki, statistik təhlillərə əsasən, son dövrlərdə Sumqayıt şəhərində baş verən yol-nəqliyyat hadisələrinin əksəriyyəti piyadaların yol hərəkəti qaydalarını pozması – xüsusilə də yol keçidlərindən düzgün istifadə etməməsi ilə bağlıdır:
“Sumqayıt Şəhər İcra Hakimiyyəti və Sumqayıt Şəhər Polis İdarəsinin birgə təşkilatçılığı ilə şəhər ərazisində yol hərəkəti qaydalarının pozulmasının qarşısının alınması məqsədilə genişmiqyaslı maarifləndirici kampaniyaya start verilib. Aksiyanın əsas məqsədi piyadalar arasında yol hərəkəti təhlükəsizliyi ilə bağlı məlumatlılığı artırmaq və onların qanunvericiliklə müəyyən olunmuş qaydalara riayət etmələrini təşviq etməkdir. Prosesə şəhər üzrə fəal gənc könüllülər də cəlb olunub.
Sakinlərdən xahiş olunur ki, yalnız piyadalar üçün nəzərdə tutulan keçidlərdən istifadə etsinlər”.
