Kimyaçılar qəsəbəsində zibil aşıb daşır. Sumqayıt24 bu barədə 22 avqust tarixində Xezerxeber.az-a istinadən xəbər verir.
Sözügedən ərazidə 15 nömrəli marşrut avtobuslarının dayanacağı yerləşir. Sakinlər burada belə vəziyyətin uzun illər davam etdiyini bildiriblər. Onların sözlərinə görə, aidiyyəti üzrə dəfələrlə müraciət edilsə də, heç bir tədbir görülməyib.
Əraziyə nəzarət edən bələdiyyənin 1 saylı məhəllə komitəsi ''Bazar Düzü'' məhəlləsinin “zibil poliqonu”na çevrilməsində sakinləri günahlandırıb:
“Küçənin bir tərəfində əhali səfərbər olub, Təmizlik Departamenti ilə müqavilə bağlanıb. Üç manat ödəniş etməklə siqnal sistemi ilə maşın daxil olur və heç bir zibil problemi yoxdur. Sözügedən ünvanda isə insanlar ödəniş etməkdən imtina edirlər, zibili hara gəldi atırlar. Nəticədə məni, yəni komitəni və Təmizlik Departamentini fəaliyyətsizlikdə günahlandırırlar”.
Sumqayıt Şəhər İcra Hakimiyyətindən isə bildirilib ki, əraziyə baxış keçiriləcək və problemin həlli üçün lazım olan tədbirlər görüləcək.
