Kimyaçılar qəsəbəsinin Səməd Vurğun küçəsində kanalizasiya sistemi yoxdur.
Sumqayit24.az-a müraciət edən yerli sakinlər şamboların ümidinə qaldıqlarını bildiriblər. Onların sözlərinə görə, sözügedən şambolardan axan çirkab sular isə yolları basır, ətrafa üfunət yayır. Yay aylarında bu qoxu dözülməz həddə çatır:
“Bəzi sakinlər həyətini hansısa kanalizasiya xəttinə qoşub. Amma xəttə qoşula bilməyənlər quyulardan istifadə etməyə məcburdur. Bu isə torpağın çökməsinə, qrunt sularının üzə çıxmasına səbəb olur”.
Yerli sakinlərin iddiasına görə, yaxınlıqdan kanalizasiya xətti keçir. Amma sözügedən küçə layihəyə salınmayıb:
“800-1000 metr yaxınlığımızda xətt çəkilsə də, bunun bizə heç bir aidiyyətı yoxdur. İnsanlar təngə gəliblər. Aidiyyəti qurumlardan təcili tədbir görməsini tələb və xahiş edirik.”
