“Avropa İnsan Hüquqları Konvensiyasının (AİHK) 6-cı maddəsi. Azərbaycan ədalət mühakiməsi İnsan Hüquqları üzrə Avropa Məhkəməsinin baxış bucağında” mövzusunda təlim keçirilib. Sumqayıt24 bu haqda 29 sentyabr tarixində xəbər verir.
Görüş Hüquq və İnsan Haqları İnstitutu Avropa Şurasının dəstəyi və Sumqayıt Apellyasiya Məhkəməsinin təşkilatçılığı ilə baş tutub. Burada ədliyyə qurumlarının, prokurorluq və məhkəmə orqanlarının əməkdaşları, mediatorlar, həmçinin Vəkillər Kollegiyasının üzvlərindən ümumilikdə 30 nəfər iştirak edib.
Apellyasiya Məhkəməsinin sədri Tofiq Paşayev bu cür təlimlərin hüquqşünasların praktiki fəaliyyəti üçün çox faydalı olduğunu vurğulayıb.
İnstitutun idarə heyətinin sədri Məhəmməd Quluzadə institutun fəaliyyət istiqamətlərindən, görüləcək işlər və qarşıda duran hədəflərdən danışıb. M. Quluzadə Avropa Məhkəməsinin ölkəmizə qarşı çıxardığı qərarlar və Sumqayıtla əlaqəli statistikanı iştirakçılarla paylaşıb.
Daha sonra təlimçi-ekspert Vüsalə Muradxanlı “AİHK-ın 6-cı maddəsi: mülki-hüquqi aspekt” mövzusunda geniş təqdimatla çıxış edib.
Hüquq eksperti Vəfaddin İbayev təqdimatında Azərbaycana qarşı qəbul olunmuş qərarlarda aşkar edilmiş pozuntular və onların aradan qaldırılması yolları, məhkəməyə müraciət hüququ, məhkəmə prosesində tərəflərin bərabərliyi, məhkəmə proseslərinin çəkişmə prinsipi mövzusunda ümumi şərhlər verib.
Məhkəməyə çatımlılıq, prosessual tələblər, “cinayət ittihamı” anlayışı, təqsirsizlik prezumpsiyası (maddə 6.2), müdafiə hüququnun təminatı (maddə 6.3), Azərbaycana qarşı çıxarılan qərarlarda ən çox tanınan pozuntular müzakirə olunub. İştirakçıların sualları təlimçi-ekspertlər tərəfindən cavablandırılıb. Mövzu ətrafında kazusların həlli qrup şəklində işlənilib.
