"LinkOil" MMC yanğın təhlükəsizliyi qaydalarını pozduğu üçün cərimələnib.
İqtisadiyyat.az-ın məlumatına görə, Fövqəladə Hallar Nazirliyi (FHN) şirkət barəsində İnzibati Xətalar Məcəlləsinin 518.1-ci (Yanğın təhlükəsizliyi qaydalarının pozulması və ya yerinə yetirilməməsi, inşaat işlərinin aparılması məqsədi ilə torpaq sahələrinin ayrılması, layihələndirilməsi, habelə ərazilərin, müəssisələrin, binaların və qurğuların tikintisi, yenidən qurulması, genişləndirilməsi, texniki cəhətdən dəyişdirilməsi və ya onların istismara verilməsi zamanı yanğına qarşı standartların, normaların və qaydaların tələblərinin yerinə yetirilməməsinə görə) maddəsinə əsasən cərimə protokolu tərtib edib.
Sənəd baxılması üçün Sumqayıt Şəhər Məhkəməsinə göndərilib. Hakim Samir İsmayılovun sədrliyi ilə keçirilən prosesdə şirkətə inzibati tənbeh tətbiq edilib, yəni cərimə kəsilib.
Xatırladaq ki, yanğın təhlükəsizliyi qaydalarını pozmaya görə fiziki şəxslərə xəbərdarlıq edilir və ya onlar 20-300 manat, vəzifəli şəxslərə xəbərdarlıq edilir və ya onlar 100-150 manat, hüquqi şəxslər isə 350-500 manat məbləğində cərimə olunurlar.
Qeyd edək ki, "LinkOil" MMC-nin Sumqayıt və Abşeron ərazilərində yanacaqdoldurma məntəqələri fəaliyyət göstərir.
