“Övladım Sumqayıt şəhəri, Bağlar massivi, Aşağı Mollu kənd tam orta məktəbində təhsil alır. Məktəbdə qızdırıcı radiator olsa da, sadəcə görüntü üçündür. Çünki həmin məktəbdə istilik yox səviyyəsindədir. Demək olar ki, siniflərin əksəriyyəti soyuqdur. Dəhlizdəki radiatorların əksəriyyəti işləyir. Bir otaqda iki qızdırıcı varsa, birini bağlayırlar ki, o birinə istilik getsin. Bu zaman isə sinif soyuyur. Çünki aparat balacadır”.
Bunu Moderator.az-a adının çəkilməyini istəməyən şikayətçi valideyn deyib. Daha bir valideyn isə iddia edib ki, özləri məktəbi peçlə təmin ediblər:
“Uşaqlardan pul yığıb otaqlara qızdırıcı alıblar. Bu təşəbbüs də əslində uşaqlardan, valideynlərdən gəlib. Çünki otaqlar soyuq olur. Məktəblilər ez-tez xəstələnirlər. Hətta soyuq olanda uşaqlar isti üst geyimləri ilə dərsdə otururlar. Qış hələ qarşıdadır. Birazdan vəziyyət daha dözülməz olacaq. Çox istərdik ki, məktəbimiz üçün əlavə istixana tiksinlər”.
Təhsil məsələləri üzrə mütəxəssis Elçin Əfəndi bildirib ki, bütün məktəblər artıq 10 gündən çoxdur ki, istilik sistemi ilə təmin olunub:
“Təhsil müəssisələrində istilik sistemi ilə bağlı tədbirlər hər il noyabr ayının 15-dən həyata keçirilir. Bu səlahiyyət “Azəristiliktəchizat” ASC-yə aiddir. Elə ucqar bölgələr var ki, orada istilik odun sobası vasitəsilə təmin edilir. Həmin qurumla Elm və Təhsil Nazirliyi arasında müqavilə imzalanır. Ola bilər ki, bəzi məktəblərdə istilik təchizatı ilə bağlı gecikmələr olsun. Yaxşı olar ki, həmin şəxslər Məktəbəqədər və Ümumi Təhsil üzrə Dövlət Agentliyinə, Elm və Təhsil Nazirliyinə məlumat versinlər. Xətdə yaranan hansısa problemlə bağlı isə “Azəristiliktəchizat” ASC-nə müraciət edə bilərlər”.
“Azəristiliktəchizat” ASC-nin mətbuat katibi Elvin Basqallı isə sözügedən məktəbin qurumun balansında olmadığını açıqlayıb.
