Sumqayıtda məktəb müəllimləri etiraz aksiyasına hazırlaşırlar.
Bu barədə Tns.az-a H.Z.Tağıyev qəsəbəsindəki 6 saylı tam orta məktəbdən məlumat verilib. Bildirilir ki, noyabrın 15-dən ölkə üzrə qış mövzümünə keçirilsə də, təhsil ocağında istilik sistemi hələ də bərpa edilməyib.
Müəllim və texniki heyət soyuğa görə məktəbə gələ bilmir:
“Noyabrın 14-dən müəllim və texniki işçilər tam heyətlə işə başlasa da, məktəbə istilik sistemi verilməyib. Məktəb rəhbərliyinin aidiyyəti qurumlara müraciəti isə nəticə verməyib. Məktəbin 125 nəfər müəllim və texniki işçisi var. Sumqayıtın ən böyük orta məktəblərindən biridir. Noyabrın 14-dən də hər gün işə gəlirik. Amma soyuqdan məktəbdə oturmaq olmur. “Azəristiliktəchizat” ASC-nin Sumqayıt İstilik Sistemləri İstismar Sahəsindən deyirlər ki, hər şey hazırdır, qazanxanalar işlək vəziyyətə gətirilib. Amma “Azəristiliktəchizat” istilik sistemini qoşmağa icazə vermir. Deyirlər ki, bu qurum hələ məktəbə limit ayırmayıb. Nə vaxt limit ayrılsa, istiliyi də onda verəcəklər. “Azəristiliktəchizat” limit ayırmasa, biz soyuqdan donmalıyıq? Heç kim şikayətimizə baxmır”.
Sumqayit24.az məsələ ilə bağlı Sumqayıt İstilik Sistemləri İstismar Sahəsinə sorğu ünvanlayıb. Qurumun əməkdaşı sorğumuza cavab olaraq qeyd edib ki, yayılan məlumat tamamilə yalnışdır:
“Məktəbəqədər və Ümümi Təhsil Şöbəsi məktəblərə istiliyin payız tətilindən sonra verilməli olduğunu bildirib. Yəni ki bu, “Azəristiliktəchizat” ASC-nin qərarı deyil”.
