Sumqayıt sakini “Azərişıq” ASC-dən şikayətçidir. Sumqayıt24 bu haqda 16 avqust tarixində xəbər verir.
Həmşəhərlimiz Elnur Şirinov bildirir ki, iki gün öncə 13-cü mikrorayon, bina 22b-də işıq sayğacı alışmağa başlayıb. Mənzildə isə yalnız iki azyaşlı uşaq olub. Bina sakinləri dəfələrlə “Azərişıq”a sayğaclardan birində “ərimə” olduğunu çatdırıblar. Amma heç bir reaksiya verilməyib.
“Sayğacı hesablamağa gəlib-gediblər, qəbzi yazıb qapılara yapışdırıblar. Lakin sayğacın vəziyyətinə fikir verməyiblər. Adam dəhşətə gəlir. Sonda isə bu son dərəcə ciddi hadisə baş verib. Uşaqlar içəridə boğulsaydılar, nə olacaqdı? Yatsa idilər nə olacaqdı? Qoxu hiss edib, qapını açıb ətrafa sıçrayan alov közlərinin altından qaça biliblər. Hələ də özlərinə gələ bilmirlər. Bu məsuliyyəti üzərinə kim götürəcək?” – deyə vətəndaş əlavə edib.
