Sumqayıtda elektrik dirəyi qəzalı vəziyyətdədir. Sumqayıt24 bu haqda 20 sentyabr tarixində xəbər verir.
Yaşıldərə bağlar massivi, 2A ünvanında yaşayan Əhməd Məcidov aşağı hissəsi çürüyən dirəyin hər an aşa biləcəyini, sakinlərin həyatına ciddi təhlükə yaratdığını bildirir. Onun sözlərinə görə, aidiyyəti orqanın işçiləri dirəyi müvəqqəti olaraq qaz borusuna bağlayaraq, onu yenisi ilə əvəz edəcəkləri vədini veriblər. Lakin üzərindən iki həftədən çox keçməsinə baxmayaraq, vəziyyət olduğu kimi qalıb.
"Azərişıq" ASC-dən bir müddət öncə Xeberle.com-a şikayətçinin əlaqə nömrəsini əldə edərək problemi operativ həll etmək niyyətində olduqlarını bildiriblər. Bundan sonra qurumun əməkdaşları həmin elektrik dirəyinin yanına yenisini qoyaraq elektrik xəttini ona bərkidiblər.
Lakin sakin görülən işlərdən də narazıdır. O qeyd edir ki, problemin həlli xeyli vaxtdır ki, uzanır. Dirəklə yüksək gərginlikli elektrik xətti keçir. Dirək aşacağı təqdirdə bədbəxt hadisə baş verə, həmçinin qəza nəticəsində 18 ailəyə elektrik enerjisinin verilişi dayana bilər. Eləcə də yüksək gərginliyi olan elektrik xətti dirəklərinin evlərin hasarlarında aşmış halda qalması, qaz borusuna birləşməsi də təhlükəlidir. Qeyd olunan nasazlığa görə böyükölçülü avtomobillər əraziyə keçə bilmir.
