Bu gün sabiq ağırlıqqaldıran, beynəlxalq dərəcəli hakim Elxan Süleymanovun 50 yaşı tamam olur. Bu haqda 2 fevral tarixində Sumqayıt24 xəbər verir.
Elxan Süleymanov 1974-cü ildə Sumqayıt şəhərində anadan olub. Uşaq yaşlarından məşğul olduğu ağırlıqqaldırma idman növündə uğurlar qazanıb. 2000-ci il Sidney Olimpiya Oyunlarının iştirakçısı olmuş Elxan Avropa çempionatının gümüş və bürünc mükafatçısı, Avropa və Dünya Kuboklarının qalibi, həmçinin bir sıra digər yarışların qalib və mükafatçısı olub.
1989-2004-cü illərdə dəfələrlə Azərbaycan çempionatının qızıl mükafatçısı, kubokunun sahibi olub. SSRİ birinciliyinin qalibi və rekordçusu olan Süleymanov Beynəlxalq dərəcəli idman ustası adına da layiq görülüb.
1998-2003-cü illərdə Azərbaycan Bədən Tərbiyəsi və İdman Akademiyasında təhsil alıb. İdmançı karyerasını bitirəndən sonra hakimliyə başlayan mütəxəssis dünya və Avropa səviyyəli, İslam Oyunları və digər beynəlxalq yarışlarda ədaləti qoruyub, Beynəlxalq dərəcəli hakim dərəcəsinə yüksəlib.
Hazırda o, məşqçilik fəaliyyətini davam etdirir, tələbələri respublika səviyyəli yarışlarda uğurla çıxış edirlər.
