“Sumqayıt"-"Səbail" matçını 3500 azarkeş canlı izləyib. Sumqayıt24 bu haqda 16 may tarixində Sumqayit.tv-yə istinadən xəbər verir.
Premyer Liqanın 34-cü turundan öncə sumqayıtlı məşhurlar - karateçi Rafael Ağayev, paralimpiya cüdoçusu İlham Zəkiyev, şahmatçı Zeynəb Məmmədyarova və müğənni Murad Arif həmşəhərlilərini tribunalara dəvət etmişdilər. Mehdi Hüseynzadə adına stadionun tam dolacağı gözlənilsə də, tribunaların cəmi 1/3 hissəsi dolub.
"Sumqayıt"ın mətbuat xidmətinin rəhbəri Zaur Xudiyevin fikrincə, tanınmış sumqayıtlıların çağırışı öz nəticəsini verdi:
“Baxmayaraq ki, bu dəfə rekord olmadı, stadion tam dolmadı, amma istənilən halda, tribunalarda 3500 azarkeş var idi. Bu isə premyer liqamızın ortalamasının çox üzərində bir rəqəmdir. Stadiona gələn və bizə dəstək verən heç bir azarkeşin əməyini kiçiltmək istəmirik. Könül istərdi ki, hər oyun anşlaq olsun, tribunalar tam dolsun, amma istənilən halda, sumqayıtlı azarkeşlər daim öz komandalarının arxasındadırlar. Fürsətdən istifadə edib, mövsümün son oyunu üçün bir daha azarkeşləri stadiona dəvət edirəm. Onların dəstəyi ilə uğurlu mövsümü major notda bitirmək istəyirik. Gəlsinlər, doldursunlar tribunaları və əsl futbol şousunu birlikdə yaradaq. Məncə, bir az zamana ehtiyac var. Uzun müddət komanda "Kapital Bank Arena"da oynayıb. Orada isə azarkeş tutumu az olduğu üçün müəyyən sayda fanatları oyuna qəbul edə bilirdik. Bu da bir növ azarkeşlərdə vərdişin itməsinə gətirib çıxarmışdı. Artıq daha geniş və müasir stadionda oynayırıq. Zamanla azarkeş sayımız da artacaq. Sevindirici haldır ki, azarkeşlərimiz arasında ailələr, uşaqlı valideynlər də var idi. Bütün bunlar gələcəyə ümidlə baxmağa əsas verir. Futbol insanların əyləncə, istirahət anlayışında yer tutur və zamanla bunun ayrılmaz parçası olacaq”.
