“Sumqayıt” basketbol klubunun baş məşqçisi müdafiədən narazıdır. Sumqayıt24 bu haqda 20 yanvar tarixində xəbər verir.
Azərbaycan Basketbol Liqasının 11-ci turunda komandamız “Xırdalan”a 90:100 hesabı ilə məğlub olub. Məşqçi Teymur Hüseynov oyunçuların tapşırıqları tam yerinə yetirmədiklərini bildirib:
“Xüsusən də rəqibin 21 xal toplayan yerli basketbolçusunu bağlaya bilmədik. Oyunçularıma deyirəm ki, rəqibin yaxşı çıxış edən üzvünə qarşı sərt oynasınlar, yeri gələndə fol etsinlər, amma... Demək olar ki, oyunumuz alınmadı. Doğrudur, 3-cü bölümdə hesab arasındakı fərqi xeyli “əritdik”. Amma sonra yenə “3-lük”lər səbətimizə “töküldü”. Yerlilər də imkanlarından aşağı səviyyədə çıxış etdilər”.
Təcrübəli mütəxəssis məşqlərdə əks-hücum üzərində çalışdıqlarını söyləyib:
“Rendallın oyununu bəyəndim. Smit və Dikson da yaxşı idilər. Növbəti matçlarda nəyi dəyişə bilərik? Sürətli əks-hücuma çıxmağı məşq edirik. Bu gün ilk hissədə, demək olar ki, qaçmadıq. Bunu bacarsaydıq, nəsə edə bilərdik”.
