“Sumqayıt”ın qızlardan ibarət məğlubedilməz klubunun kapitanı müsahibə verib. Sumqayıt24 bu haqda 30 dekabr tarixində FutbolPress-ə istinadən xəbər verir.
“Futbola gəlişiniz necə olub?” sualını kapitan Aybəniz Əsgərzadə belə cavablandırıb:
- 2004-cü ilin avqustundan futbolla məşğulam. 12 yaşım var idi, həyətdə oğlanlarla futbol oynayırdım. Dedilər ki, "Sumqayıt"ın qız komandası var, get, orada oyna. İlk gəlişim də belə oldu.
Hansısa tərəddüdləriniz var idimi? Bizdə belə düşüncə var ki, "qız nədir, futbol nədir".
- Xeyr, tərəddüdüm olmayıb. Qızlar artıq digər idman növlərində olduğu kimi, futbolda da sözlərini deyirlər. Onlar ən yaxşı şəkildə mübarizə apararaq, fikirləri dəyişib.
Ailənizin qərarınıza reaksiyası necə oldu?
- Anam futbola getməyimi, ümumiyyətlə, idmançı olmağımı istəmirdi. Deyirdi ki, ya həkim, ya da riyaziyyat müəllimi ol. Ancaq atam anamdan fərqli olaraq, idmançı olmağımı istəyirdi. Buna baxmayaraq, qərarımı verəndə hər iki valideynimin reaksiyası normal oldu. Bu günə kimi də bütün çətinliklərdə dəstəklərini əsirgəməyiblər.
Dostlarınızın münasibəti necə idi?
- Əvvəl deyirdilər ki, sən hara, futbol hara. Qız futbol oynamaz. Amma sonra vəziyyət dəyişdi. Millinin də uğurlu çıxışından sonra müsbət reaksiyalar görürük.
Təzyiqlərə görə heç qərarınızı dəyişmək fikriniz yaranıb?
- Hər işin çətinlikləri var, qarşıma məqsəd qoymuşdum və çatdım. Peşman deyiləm. Bir də dünyaya gəlsəm, yenə futbolçu olaram.
Qızlar üçün futbolçu olmağın hansı mənfi və müsbət tərəfləri var?
- Mənfi tərəfləri zədələr, onun gələcəkdə yarada biləcəyi problemlərdir. Eyni zamanda ailə həyatı qurandan sonra da idmandan uzaq düşə bilirsən. Müsbət tərəfi isə yarışlara gedir, idmançıları tanıyır, dünya görüşünü artırırsan.
Qadın futbolumuzun səviyyəsini necə dəyərləndirirsən?
- Normaldır, çox istəyərdim ki, daha yaxşı olsun. Buna da vaxt lazımdır. İnanıram ki, gələcəkdə daha yaxşı səviyyəyə çatacağıq. Qız komandaların sayı getdikcə artır, maraq böyüyür. Pis tərəfi də var ki, bizdə daxili yarış bir dənədir. Ölkə çempionatından başqa, turnir olmur. Daha çox yarış daha çox inkişaf deməkdir.
Azərbaycan yığması Millətlər Liqasında B Liqasına yüksəldi. Bu haqda fikirlərin nədir?
- Millinin uğurlu çıxışı hər birimizi qürurlandırır. Arzu edirik ki, daha yüksək yerlərə çataq. İdmançılarımızın uğurlu çıxışı bu sahəyə marağı artırır. Qızlar diqqətdə olur, efirlərə çıxır, tanınırlar. Bu, artıq digər qızlar üçün də stimul olur.
Səhv etmirəmsə, futbolla yanaşı, hakimliklə də məşğul olmusunuz…
- Bəli, futbolçu olmaqla yanaşı, həm də hakimlik edirdim. Amma sonra bu sahədən ayrıldım.
Nə üçün?
- Çatdıra bilmirdim. Həm futbol oynayıram, həm idman təhsili alıram, həm də məşqçilik edirəm. Buna görə hamısını eyni zamanda etmək olmurdu. Ona görə qərara aldım ki, hakimliyi bitirim.
Hakim, məşqçi və futbolçu. Hansı daha çətindir?
- Ən çətini məşqçilikdir. Çünki müxtəlif psixologiyada olan uşaqlarla işləyirsən. Futbol belədir ki, sən oynayırsan, məşqçi sənə öyrədir. Məşqçinin işi daha çətindir. Hakimlik isə elədir ki, qaydaları yaxşı bildinsə, yaxşı hakim olacaqsan. İşin asan keçəcək.
Hakimliyi asan qiymətləndirdiniz, amma hazırda tək ölkə deyil, dünya futbolunda hakimliklə bağlı ciddi problemlər var. Asandırsa, niyə problemlər çox olur?
- Əvvəlki illərə baxanda indiki yaxşıdır. Dünya futbolunda deyə bilmərəm, amma Azərbaycan futbolunda yeni nəsil hakimlər gəlir. Maraqlanır, qaydaları öyrənirlər. Daha az səhv etməyə çalışırlar.
Məşqçi olduğunuzu qeyd etdiniz. Dünya futbolunda uğur qazanan qadın məşqçi, demək olar, yoxdur. Dünya, Avropa çempionu olan qadın komandalara da kişilər rəhbərlik edir. Sizcə, qadın məşqçi seçimi nə dərəcə uğurludur?
- Çünki əvvəl qadın məşqçilər az olub, üstünlük kişilərdədir. Ona görə də qadınlar uğur qazana bilmirlər. Onların inkişafına dəstək olmaq, şans vermək lazımdır. İnanıram ki, bir neçə ilə qadın məşqçilər də uğurlu olacaqlar.
Məşqçi kimi qarşınızda hansı hədəf var?
- İstəyirəm ki, idman ustası və əməkdar məşqçi adlarını qazanım.
Neçə vaxtdır məşqçi işləyirsiniz?
- 6 ildir oğlan komandaları ilə işləyirəm. Aşağı yaş qruplarına hazırlıq keçirəm.
Qadın futbolçulardan ibarət Azərbaycan yığması uğurlu çıxış edirsə, kişilərdə vəziyyət əksinədir. Sizcə, nə üçün kişilərin futbolunda nəticələr qənaətbəxş deyil?
- Çünki normal stadionlar yoxdur, yerli məşqçilərə şans verilmir. Aşağı yaş qruplarında vəziyyət ürəkaçan deyil. Məşqçilər uşaqlarla prinsip aparırlar, istedadlı oyunçular kənarda qalırlar.
Qadınlar da həmin stadionlarda oynamır?
- Düzdür, biz də həmin stadionlarda oynayırıq. Kişilərin futbolunda yerli məşqçi problemi də var. İnanıram ki, orada da vəziyyət düzələcək. Amma ilk növbədə stadionlar düzəlməlidir, bu baxımdan problemlər var.
"Sumqayıt"da işləriniz necə gedir?
- Ötən mövsüm çempion olduq. Bu il də məğlubiyyətsiz yolumuza davam edirik. Məşqçilərimizin tapşırıqlarını dinləyir, meydançada yerinə yetiririk. Eyni zamanda davamiyyətimiz yerindədir, hər məşqdə səylə çalışırıq. Bunun nəticəsində uğurlu çıxış edirik.
