Sumqayıt Olimpiya İdman Kompleksinin bədii gimnastları təlim-məşq toplanışına başlayıblar. Sumqayıt24 bu haqda 8 fevral tarixində xəbər verir.
Bakıdakı Milli Gimnastika Arenasının məşq zalı onların ixtiyarına verilib. Bir həftəlik hazırlığın məqsədi gimnastikanın inkişaf etdirilməsi, idmançıların fiziki cəhətdən yerli və beynəlxalq yarışlara hazırlıqlarının gücləndirilməsidir.
Gənc idmançılar təcrübəli məşqçilərin rəhbərliyi altında gürzlər, top, halqa, lentlərlə müxtəlif gimnastika və rəqs hərəkətlərini yerinə yetirirlər.
Sumqayıt Olimpiya İdman Kompleksinin məşqçisi Fatimə Qurbanova bildirib ki, təlimlər müxtəlif kombinasiyalarda çıxış edən idmançılar üçün əhəmiyyətlidir. Onun sözlərinə görə, 2011-2016-cı il təvəllüdlü gimnastlar yüksək təcrübəyə malik peşəkarların tapşırıqlarını yerinə yetirirlər.
