"Sumqayıt" futbol klubunun Müşahidə Şurasının iclası olub. Sumqayıt24 bu haqda 2 dekabr tarixində xəbər verir.
Toplantı “Azərkimya” İstehsalat Birliyinin inzibati binasında gerçəkləşib. Müşahidə Şurasının (MŞ) sədri Abdulla Məmmədov gündəlikdə duran məsələlərdən danışıb. Sonra klub prezidenti Riad Rəfiyev “Sumqayıt”ın ötən təqvim ilindəki hesabatını təqdim edib.
Ardınca Abdulla Məmmədov şəxsi işləri ilə əlaqədar MŞ-də təmsil olunmaq istəməyən "Azərkimya" İB-nin Həmkarlar İttifaqının sədri Aydın Xəlilov və keçmiş baş direktoru İmran Arzumanzadənin əvəzinə, Birliyin baş direktoru Elnur Məmmədli və SOCAR-nin Aparat rəhbərinin müavini Ayxan Əliyevin şuraya qəbul edilməsini təklif edib. Təklif yekdilliklə qəbul olunub.
Daha sonra Məmmədov digər işləri ilə əlaqədar vəzifədən istefa verdiyini, fəaliyyətinə sıravi üzv kimi davam etmək istədiyini bildirib, sədr kimi isə Elnur Məmmədlinin namizədliyini irəli sürüb. Təklif səsə qoyularaq yekdilliklə qəbul edilib.
Sonda klubun gələcək planları, qarşıdakı hədəflər və görüləcək işlər barədə fikir mübadiləsi aparılıb.
