“Sumqayıt” klubu “Qarabağ”ı 4 ildir ki, evdə məğlub edə bilmir. Sumqayıt24 bu haqda 8 dekabr tarixində xəbər verir.
“Kimyaçılar” sonuncu dəfə 2019-cu ilin noyabrında “köhlən atlar”dan 3 xal ala biliblər. Həmin vaxtdan komandalar 6 dəfə şəhərimizdə qarşılaşıb. Bu oyunların yalnız ikisi heç-heçə bitib. Son 4 matçda Ağdam klubu “quru” hesabla qələbə çalıb.
Kollektivlər arasında çempionatda keçirilən son 10 görüşün hamısında “Qarabağ” qol vurub. “Sumqayıt” axırıncı dəfə 2021-ci ilin fevralında öz meydançasındakı matçda (0:0) qapısını toxunulmaz saxlayıb.
Ümumiyyətlə, “Sumqayıt” bu rəqibi ilə Premyer Liqa çərçivəsində 45-ci dəfə görüşür. Son çempion və vahid lider böyük üstünlüyə malikdir. 44 qarşılaşmanın cəmi 6-sını “kimyaçılar” qazanıb.
Komandalar indiyə qədər 5 dəfə heç-heçəyə razılaşıblar. Qalan 33 oyunu isə “Qarabağ” qazanıb. “Sumqayıt” klubu 21 qol vurub, əvəzində isə 108-ni buraxıb.
Qeyd edək ki, “Sumqayıt” - “Qarabağ” matçı bu gün “Kapital Bank Arena” stadionunda keçiriləcək. Premyer Liqanın 16-cı turununun qarşıdurması saat 19:30-da başlayacaq.
