“Sumqayıt”a rəqib düşən “Fehervar”ın parlaq tarixi var imiş. Sumqayıt24 bu haqda 21 iyun tarixində xəbər verir.
Macarıstan klubu 1941-ci ildə qurulub. Ölkəsində üçqat çempion, səkkiz dəfə gümüş, dörd dəfə isə bürünc mükafatçı olub. Həmçinin iki dəfə ölkə kubokunu, iki dəfə superkubok və üç dəfə Liqa Kubokunu qazanıb.
"Qırmızı-göylər"ın baş məşqçisi Tamaş Petodur. O, bu posta iyunun 15-də təyin edilib.
"Fehervar"ın adı tarixən dəfələrlə dəyişib. Komanda ən böyük uğurunu 1984/1985 mövsümündə "Videoton" adlandığı vaxt əldə edib. Macarlar həmin dönəmdə UEFA Kubokunun finalınadək irəliləmişdilər. Turnirdə “PSJ” və "Mançester Yunayted" kimi klubları yenən komanda finalda "Real Madrid"ə uduzmuşdu.
Qeyd edək ki, "Sumqayıt" və "Fehervar" UEFA Konfrans Liqasının II təsnifat mərhələsində qarşılaşacaq. “Kimyaçılar” ilk matçı iyulun 25-də evdə, cavab qarşılaşmasını isə iyulun 31-də səfərdə keçirəcəklər.
