Sürücülərin fikrincə, Bakı–Sumqayıt şosesindəki avtobus zolağına müəyyən vaxtlarda daxil olmağa icazə verilməlidir. Sumqayıt24 bu haqda 5 aprel tarixində ARB Xəbər-ə istinadən xəbər verir.
“Şamaxinka” kimi tanınan ərazidə ikizolaqlı yolun bir zolağı avtobusların hərəkəti üçün ayrılıb. Amma ərazidəki nişanda qeyd olunub ki, avtomobillər yalnız pik saatlarda zolağa daxil ola bilməz. Digər vaxtlarda isə, nəqliyyat vasitələrinin avtobus zolağı ilə hərəkəti sərbəstdir.
Bakı–Sumqayıt yolu isə 5, 6, bəzi yerlərdə isə 7 zolaqlıdır. Pik saatlardan kənar vaxtlarda nəqliyyat axını çox olmur. Avtobus zolağına daxil olmadan da sürücülər sərbəst hərəkət edə bilirlər. Məhz buna görə də qadağa bütün saatlara şamil edilib.
Azərbaycan Yerüstü Nəqliyyat Agentliyindən bildirilib ki, ərazidə bütün təhlillər aparıldıqdan sonra nəticəyə əsasən, bu qərar verilib. Hər hansı dəyişiklik nəzərdə tutulmur.
