Sumqayıt Avtovağzalı günlərdir işıqsız qalıb. Sumqayıt24 bu haqda 29 iyun tarixində Oxu.az-a istinadən xəbər verir.
Avtovağzalda çalışdığını deyən şəxs sahibkarların mallarının xarab olduğunu iddia edir:
"Dəfələrlə etdiyimiz müraciətlərə baxılmır. Bakı–Sumqayıt istiqamətində kartla işləyən avtobuslarda ödəniş etmək mümkün olmur. Kart sistemlərinin heç biri işləmir. Heç bir tədbir görülmür. Heç bir müəssisə dörd gün işıqsız qala bilməz. Kabel yanıb, heç bir tədbir görən yoxdur".
"Azərişıq" ASC məsələyə aydınlıq gətirib. Bildirilib ki, Sumqayıt Avtovağzalında binanın daxilindən keçən kabelin yanmasına görə elektrikin verilişi kəsilib:
"Artıq üç gündür daxil olan şikayət əsasında Sumqayıt Avtovağzal Kompleksinin nümayəndələrinə bildirilib ki, sözügedən problem "Azərişıq" ASC-nin xidmət sahəsinə aid deyil. Qurum olaraq biz sayğaca qədər elektrik enerjisinin verilişini təmin edirik. Problem isə qurumun daxilində sıradan çıxan kabel səbəbindən yaranıb. Onlara problemin aradan qaldırılması üçün "ASAN Kommunal"a müraciət etmələri tövsiyə edilib. Xidmət sahəmizə aid olmasa da, işçi qüvvəmiz problemin həllinə kömək edə bilər. Lakin Avtovağzal Kompleksinin nümayəndələri müxtəlif vasitələrlə problemin həllindən yayınır və bunu qurumun üzərinə atırlar. Əslində isə bu proseslərin hər biri "ASAN Kommunal"a müraciət olunmaqla həll edilməlidir".
